2 Samuel 15

Mangkato, mesuami Absalom umparandan kareta sia darang sia tau limangpulo dolo ma’dondo-dondo dio olona.

Melambi’oi maleoi tu Absalom nabendan dio biring lalan lu lako babangan. Mintu’ tu to la lao umbaa kara-karana lako olona datu, kumua anna dipaolai salunna, natambai Absalom anna ma’kada nakua: Umbara munii sae? Iake nakuai: Iate kaunammi lu dio mai suku iato ba’tu suku iato lan Israel,

nakuami Absalom lako: Iatu kara-karamu tae’ nasala sia tonganna, apa dio datu misa’ tau tae’ tu la umperangiiko.

Sia nakuapa Absalom: Oo, iakenna susinna aku diangka’ to ma’paolai salu lan tondok iate, lendu’ ia melona; kumua anna mintu’ tau tu den kara-karana ba’tu kasigaganna, ma’din sae lako kaleku, angku sanda tonganni.

Sia iake denni tau menomba dio olona, napadondongammi limanna, natoei anna udungi.

Susimoto tu kedona Absalom lako mintu’ to Israel, tu sae mennolo lako datu la dipaolai salunna tu kara-karana; susito naalami Absalom tu penaanna to Israel.

Iatonna upu’mo patangtaun, ma’kadami Absalom lako datu, nakua: La naeloranna’ puangku male lako Hebron, belanna la umpalesso’na’ pangallonangku lako PUANG.

Belanna dolona tongki torropa dio Gesur lan tondok Aram, mangallonanna’, kukua: Iake Napasule siana’ PUANG lako Yerusalem, manassa la mengkaolana’ lako PUANG.

Nakuami datu lako: Male marampa’moko. Ke’de’mi tu Absalom anna male lako Hebron.

Iatu Absalom mangkamo ussua ba’tu pira-pira mata-mata lan mintu’ suku Israel, nakua: Iake mirangimi tu oni napiri tanduk, attu iato la rambankomi metamba, mikua: Absalommo dadi datu dio Hebron!

Iatu to nasolan Absalom ke’de’ dio mai Yerusalem duaratu’, mintu’i to ditambai tama pa’maruasan. Mintu’nate tau iate malambu’ penaanna male belanna tae’ natandai tu iannato.

Iatonna la untunumo pemala’ tu Absalom, mesuami untambai Ahitofel, to Giloni, ada’na Daud, sae dio mai Gilo, tondokna. Iatu kasipakulu-kuluan salangngan-langnganna, na iatu to unturu’ Absalom sabuda-budannamo.

Saemi misa’ tau umpokadanni Daud, nakua: Iatu penaanna mintu’ to Israel ma’mirringammo la unturu’ Absalom.

Ma’kadami Daud lako mintu’ taunna tu nasolan dio Yerusalem, nakua: Ke’de’ nasangkomi, melo ke mallaiki’, belanna iake tae’i nasusito, tae’ takullei tilendok dio mai olona Absalom. Madoi’komi male, da nata’pa ullambirangki’ sia nasanggangiki’ sia napatei pa’dang tu mintu’ to lan kota iate.

Mebalimi tu taunna datu, nakua: Inaammi bang puang, sakka’mokan unturu’i.

Tassu’mi tu datu sola mintu’ to lan tongkonan layukna anna lumingka, apa napatorro datu tu gundi’na sangpulo la ungkampai tongkonan layuk.

Tassu’mi tu datu naundi tu to buda dio boko’na anna torro dio Banua Mambela.

Iatu mintu’ taunna lumingka lendu’ dio olona, susi dukato tu mintu’ to Kreti sola to Pleti. Ia duka tu mintu’ to Gat, annan ratu’na, tu lu dio mai Gat, tu unturu’ datu, lumingka lendu’ dio olona datu.

Ma’kadami datu lako Itai, to Gat: Ma’apari muundi dukara unnula’kanni? Sulemoko ammu torro sola datu, belanna to saeko, sia to diula’i lan mai tondokmu.

Mane sangmai’ ammu sae, ma’apai angku la ussolangko te allo iate male sola salamba salao. Manassa la malena’ lako umba-umba tu ma’din kunii male. Apa iatu iko la suleko musolanni tu mintu’ siulu’mu. Nakamasokanammora sia kamarurusan urrondongko.

Apa mebali tu Itai lako datu, nakua: La lelukraka tuoNa PUANG sia tuona puangku datu, umba-umba nanii tu puangku la tuo ba’tu la mate, inde dukato dio nanii sola taunna.

Nakuami Daud lako Itai: Iake susito, maimoko, mulumingka lendu’ dio oloku. Ke’de’mi male tu Itai to Gat sola mintu’ taunna sia anakna tu nasolan, lendu’ dio olona datu.

Unnurruk-urrukmi tumangi’ tu mintu’ tau lan tondok, tonna lendu’ mintu’ to buda; ullambanmi salu Kidron tu datu sia iatu mintu’ to buda male lu lako padang pangallaran.

Ia duka tu Zadok dio ren sola mintu’ to Lewi umbulle patti basseNa Puang Matua; male duka tu Abyatar unturu’i; napatorromi tau iato mai tu pattinNa Puang Matua sae lako tappunna lendu’ tu to buda tassu’ lan mai kota.

Nakuami datu lako Zadok: Baai tama kota sule tu pattinNa Puang Matua Iake Nakaturu-turui siana’ PUANG, manassa Napasule siana’ sia Napatiroi pole’na’ tu pattinNa sia kao’koranNa.

Apa iake Nakuai kadanNa kumua: Tae’mo Kuporaiko, inaanNa bang, da’ito anNa pogau’i lako kaleku tu Nasanganna melo.

Sia nakua datu lako to minaa Zadok: Tae’raka mimisa’ to patanda-tandan? Sule marampa’mokomi tama kota, sola tu anakmi Ahimaas sia Yonatan, anakna Abyatar, tu anakmi sola duakomi misolan.

La ma’kampana’ dio kalambanan dio padang pangallaran sae lako saena tu kareba misua tau umparampoanna’.

Nabaami Zadok sia Abyatar sule tu pattinNa Puang Matua lako Yerusalem, anna torro dio.

Kendekmi tu Daud unnola mennaa’na buntu Saitun tumangi’ lolanan, sia mellullung sia lumingka tang ma’lapik lentek; sia mintu’ tu tau nasolan mellullung sia tuka’ situang tangi’na.

Attu iato napokadami tau lako Daud nakua: Iatu Ahitofel dio lu sola tu to sipakulu-kulu Absalom. Nakuami Daud: O PUANG, padampai tu pa’timbanganna Ahitofel.

Iatonna rampomo Daud langngan botto tanete, tu inan nanii tau biasa menomba langngan Puang Matua, sitammumi Husai, to Arki, tu ma’bayu lamba’ serek-serek sia ponno barra’-barra’ tu ulunna.

Nakuami Daud lako: Iake maleki’ sola, manassa mupamagasana’,

apa iake suleko tama kota ammu ma’kada lako Absalom: Aku te taunnamo’ puangku, moi anna dolona taunnana’ ambe’mi; apa totemo taunnamo’ puangku; nasusito ma’din mupadampa tu pa’timbanganna Ahitofel.

Tang dio siaraka musolan tu to minaa Zadok sia Abyatar? Mintu’ tu apa murangi lan tongkonan layukna datu, la mupokada lako to minaa Zadok sia Abyatar.

Iatu anakna sola duai dio sola, iamotu Ahimaas, anakna Zadok, sia Yonatan, anakna Abyatar. Iatu mintu’ apa murangi la rampo lako kaleku tete dio tau iato.

Iatonna rampo tu Husai, sangmanena Daud tama kota, attu ia dukato natama kota Yerusalem tu Absalom.